shayad use bhi kabhi, yaad youn meri aati hogi,
zikra se kabhi mere, dhadkan tham jaati hogi

padhke puraane khato ke kutch shireen lafz,
udaas man se shayad, vo bhi muskuraati hogi

Roti hogi vo bhi andheron mein kabhi tanha,
naqaab mein shayad, nam aankhein chhupaati hogi

aks mein khudke, dhoondhtee hogi mera chehra,
kore kaagaz pe fir, meri tasveer banaati hogi

har saans mein uski mera naam chhupa tha,
jaane bin 'majrooh' ke, ab kaise jee paati hogi

Ae Khuda !

ae khuda kutch aasaan mera ye safar kar de,
yaa milaa de usse ya zindagi muqtsar kar de,

pathrayi aankhon ko abhi bhi ek intzaar hai,
benoor kar mujhe, ya usse roobaroo nazar kar de

har dhadkan jiske karz mein doobi hai meri
Mere ashkon ka us rafeeq pe kutch asar kar de

kutch yaadon ka bojh bhaari hai is dil par
vo yaad mitaa de ya use paana muyassar kar de

ya paigaam-e-mohobbat 'majrooh' ka use pahucha de
ya azrael banke meri maut ki use khabar kar de

use ilm bhi nahi hota, aur vo dil dukhaa deti hai
anjaane mein hi shayad, ek dost ko rulaa deti hai

beraham mera rafeeq nahi, aasim meri kismat hai
jo har baar jaane kis, gunaah ki sazaa deti hai

zindagi ki murshid-i-kamil hai tanhai bhi
akele hi apne aansoon, peena sikhaa deti hai

shayad naa jeeta 'majrooh', kabhi youn bebas hoke,
par ye teri chahat, use marne bhi kahaan deti hai

Dost...

Dost ban ban ke mile sabhi mujhe mitaane vaale
Makhmali naqaab mein the, log mujhe rulaane vaale

Koi gair nahi the vo, jo barbaad kar gaye,
Dil mein hi the, is dil ko dukhaane vaale

Chehra kutch tha, haqeeqat kutch aur,
Muskura rahe the vo, mujhe rona sikhaane vaale

Aitbaar mera gunaah tha, aur ashq meri sazaa,
'Majrooh' pe hanste honge, saare zamaane vaale

kyoon aayi meri zindagi mein, aur kyun mujhe pareshaan chhod gayi
aankhon mein adhoora intzaar, aur dil mein ankahe armaan chhod gayi

jis pal tujhse milaa tha, jaise khud ko paa liya tha meine,
meri khud se pehchaan karaane ka, mujhpar ek ehsaan chhod gayi

tujhse pehle bematlab thi ye zindagi, aur bevajah hai tere baad bhi,
mili thi ek adhoore shaks se, aur peeche ek naummeed insaan chhod gayi

kaise bhool sakta hoon use jisne dil ko chhua tha apni har nazar se,
jo teri yaad dilaate rahien, dil mein aise daaim nishaan chhod gayi

ilm to tujhe bhi tha, ki bemaksad hai mera jeena tere bina,
fir kyun tadapne bhar ke liye, 'majrooh' mein thodi si jaan chhod gayi

Mere kutch sawaal...

Jee to raha hoon ye zindagi par jaise kutch malaal baaki hai,
zindagi ne to mujhe parakh liya, par mere kutch sawaal baaki hai

kyon har zakhm ki dava nahin, kyun use bhulaana mumkin nahi
gar kismat mein judaai hai, to kyun zehan mein uska khayal baaki hai?

naa hansta hoon dil se, naa hi aansoon nikal paate hian aankhon se,
khamosh siskiyon se bhare, aise kitne aur saal baaki hain?


kyun shikayat hai mujhe kisise, kyun ummeed kari thi kisise,
jhoothe rishton ke, khokhle vaadon ke kitne aur jaal baaki hai?

kyun jee raha hoon aise ki jaise koi ehsaan chuka raha hoon,
kitna karz utar gaya aur kitna hisaab filhaal baaki hai?

kyun vo dard dete hain jo dil ke bahut kareeb hote hain,
kabhi samajh paye to batayenge, 'majrooh' ke kayi maqaal baaki hain

jaane kyun kutch youn lagta hai, jaise vo aaj bhi kahin aas paas hai,
vo kahin mujhmein hi bas gayi hai, jaise saanson mein uska ehsaas hai

juda jism hote hain, use to apni rooh mein chhupa laya tha mein
vo yaheen kareeb hi hai par jaane kyun ye dil fir bhi udaas hai

mein youn hi roz ise samjhaata hoon, naye bahaanon se behlaata hoon
jaane kyun tadapta hai uski yaad mein, mera dil bhi naa-shinaas hai

har gam ko mita sakta hoon, har dard ko bhoola sakta hoon mein
par use bhoolna mumkin nahi, uski yaadon mein bhi kutch khaas hai

roz use dhoondta tha, ab lagta hai khudko hi kho chuka hoon
'majrooh' zinda hi aise hai, ki shayad use paa lene ki koi aas hai